23.07.2018, 9:56 1055 Күрес түрлерінен Азия чемпионаты аяқталды

Үндістанның Нью-Дели қаласында күрес түрлерінен жастар арасында Азия чемпионаты мәресіне жетті. Жарыстың соңғы екі күнінде бозкілемге еркін күрес балуандары күш сынасып, 10 салмақ дәрежесінде жеңімпаздар мен жүлдегерлерді анықтады, деп хабарлайды «SPORTINFORM» САА тілшісі ҚР Күрес түрлері федерациясына сілтеме жасап.

Өкінішке қарай, еркін күрес балуандарына Азия чемпионатының бас жүлдесі бұйырмады. Екі балуанымыз финалдық бәсекеде белдескенімен қарсыластарына есе жіберіп, күміс медальды қанағат тұтты. Атап айтсақ, 61 келідегі Талғат Сырбаз алтын медаль үшін болған белдесуде өзбекстандық балуаннан 4:6 есебімен жеңіліп қалса, 97 келідегі Серік Бақытжанов ирандық қарсыласынан 1:6 есебімен ұтылды.

Қола медаль Нұрқожа Қайпанов (70 келі), Ерғали Әлішер (92 келі), Омар Эюбов (125 келі) сынды балуандардың еншісінде.

Командалық есепте Иран, Үндістан және Өзбекстан құрамалары үздік үштікті құрады. Жапония - төртінші орында. Қазақстан балуандары бесінші орынға табан тіреді.

Осылаша еліміздің жас балуандары Азия чемпионатында барлығы 3 алтын, 2 күміс, 11 қола медальға ие болды. Оның 2 алтын, 5 қола медалін грек-рим күресінің балуандары қоржынымызға салса, қыздарымыздың еншісінде 1 алтын, 3 қола медаль бар.

  • Достармен бөлісу:
  • ЖАҢАЛЫҚТАР
  • Танымал