17.09.2018, 12:18 1447 Польшадағы халықаралық турнирде төрт қазақстандық бұрымды боксшы алтын иеленді

Польшада өткен әйелдер арасындағы халықаралық турнирде отандастарымыз 4 алтын медаль иеленді. Сонымен қатар, Қазақстан құрамасының қоржынында 2 күміс және үш қола медаль бар, деп хабарлайды «SPORTINFORM» САА тілшісі Қазақстандық бокс федерациясына сілтеме жасап.

Силезия аймағында өткен XII халықаралық турнирдің финалында 6 отандасымыз өнер көрсетті. Олардың ішінде Жайна Шекербекова (51 келі), Карина Ибрагимова (60 келі), Фариза Шолтай (81 келі) мен Ләззат Күнгейбаева (81+ келі) алтын алқа иегерлері атанды. Әйгерім Қасенаева (48 келі) мен Мадина Нұршаева (64 келі) күміс жүлдені қанағат тұтты. Сондай-ақ, Дариға Шакимова (75 келі), Милана Сафронова (64 келі) мен Владислава Кухта (57 келі) қола жүлдеге қол жеткізді.

Әйгерім Қасенаева (48 келі) ақтық кездесуде 5 дүркін Әлем чемпионы Мэри Комнан (Үндістан) ұтылды. Есеп 4:0.

Жайна Шекербекова (51 келі) ақтық сында жергілікті Сандра Драбикті (Польша) 4:1 есебімен тізе бүктірді.

Карина Ибрагимова (60 келі) финалда ресейлік Анастасия Беляковадан 4:1 есебімен басым түсті.

Мадина Нұршаева (64 келі) өкінішке орай, украиналық Мария Бовадан ұтылды. Есеп 4:1.

Фариза Шолтай (81 келі) Агата Качмарскиден (Польша) айласын асырды.

Соңғы болып рингке көтерілген жерлесіміз Ләззат Күнгейбаева финалда ресейлік Кристина Ткачеваны жеңді. Есеп 4:1

Осылайша бокстан Қазақстанның қыздар құрама командасы елімізге 9 медальмен оралады.

  • Достармен бөлісу:
  • ЖАҢАЛЫҚТАР
  • Танымал